Elsie Gahimbare

38 w

Intare batinya.

UBURYO NEVA AKORESHA MU GUTWARA BUDAHIMBARA IBIHANGANGE BIMWE BIMWE

Kuva ashitse ku butegetsi muri 2020, umukuru w'igihugu Evariste Ndayishimiye arafise umukenyuro akoresha utanezera bamwe.

NOMERO ZIWE ZA TEREFONE KU BANYAGIHUGU

Umunyagihugu wese arafise uburenganzira bwo kwandikira Sebarundi. Haba kuri whatsapp canke ku nomero isanzwe.

Ivyo bitandukanye n'uko vyari vyifashe ku ntwaro ya Petero Nkurunziza. Uti bitaniye he ? Nkurunziza akiramutswa igihugu, bisa n'uko hariho akarwi k'abantu bamupangira ivyo akora vyose. Baramuzanira agashirako umukono. Ariko vyarashika abo bantu bakamuhenda bivanye n'inyungu barondera. Guhendwa rero vyatuma afata ingingo zitameze neza canke ataco zifasha umunyagihugu muto. Hari n'ababogozwa mu mabanga kubera kudenderezwa!

Biboneka ko uwo mutego Evariste Ndayishimiye yawutahuye. Mu gukenyura, yaciye aha inomero za terefone abanyagihugu. Nk'iyo hari dossier iriko irigwa yerekeye akarere runaka, araheza akibariza abanyagihugu vyega. Mbere, hari n'amakuru amushikira inzego zitandukanye zibijejwe zitarabimenya. Muri ico gihe, biragoye kumuhenda.

ABASHAVURA NI BANDE?

Ni bamwe mu bakora mu bisata bitandukanye vya reta, abarwizatunga na bamwe mu banywanyi ba CNDD-FDD baguma bagerageza kunyonora ivy'igihugu. Kenshi rero abanyagihugu baravyandikira umukuru w'igihugu. Barabimubwira.

Mu gutanga amasóko, haraba amanyanga akomeye. Akarorero: nk'umutegetsi ashaka kugura ibintu bitandukanye bikenewe mu gisata ciwe, urashobora gusanga mu nteguro y'ibigurwa yanditse ko ikaramu imwe ifise agaciro k'ibihumbi 3, isabuni imwe akavuga ko igurwa ibihumbi 6, imodoka y'imiliyoni 10 akayiha agaciro ka miliyoni 50, ...Nk'uwo rero ntanezerwa asanze vyamenyekanye.

IGITURIRE GITWARA UBWENGE

Umutegetsi amaze kuja mu vyo kunyonora canke kurya ibiturire, ubwenge bwiwe buragabanuka, agasigara akora ibintu bigoye gutahura. Akarorero: mu misi iheze, abanya Bujumbura baguye mu gahundwe babonye umuntu ariko arashinga inyubakwa mu kibanza citiriwe ukwikukira (place de l'indépendance).

Hari amakuru yemeza ko yariko yubakaho akabare! Ubuyibozi bw'igisagara bwo buvuga ko wari umusarani rusangi (toilette publique). Dufate ko wari umusarani rusangi. None ikibanza wari ukwiye kwubakwamwo ni kirya? Umutegetsi yatanze rurya ruhusha ni nde?

Uwo muntu yaciye yihutira kubomora kubera vyaciye bishikira Sebarundi ubwo nyene.

Gira ico ushikirije